तोलाकान्त बगाले
वालिङ, ५ असोज ।
स्याङ्जाको वालिङमा स्थापना भएको द ब्रदर्शको आयोजनामा शनिबार वालिङमा फुटसल प्रतियोगिता भएको छ । स्याङ्जा जिल्लासहित बाहिरी जिल्लाको पुरुष खेलाडीहरुको सहभागितामा द ब्रदर्शले वालिङ ८ बिपीचोकस्थित वालिङ स्पोटस् सेन्टरमा प्रतियोगिता सम्पन्न गरेको हो ।
दोस्रो संस्करणको यस प्रतियोगितामा बोल्नुहुँदै वालिङ नगरपालिकाका निवर्तमान नगर प्रमुख दिलीपप्रताप खाँणले द ब्रदर्शले फुटबल खेलको विकाससँगसँगै यहाँबाट संकलन भएको रकमबाट सामाजिक उत्तरदायित्वका क्षेत्रहरुमा सहयोग गरेकोमा खुसी ब्यक्त गर्नुभयो । नयाँ नयाँ खेलाडीहरु उत्पादन गर्न र पुराना खेलाडीहरुलाई प्रोत्साहनकालागि पनि यस प्रकारका प्रतियोगिताहरुको निरन्तरता रहने बताउनुभयो । वालिङमा खेल क्षेत्रको विकास तथा खेलाडीहरुको क्षमता विकासकालागि पनि विशेष ध्यान दिनु जरुरी रहेको बताउनुभयो ।
कार्यक्रममा सशस्त्र प्रहरी बल ३० नं गुल्मका गुल्मपति लीलाबहादुर भुजेल, वडा नं ११ का वडा अध्यक्ष डण्डु पंगेनी, वडा नं १० का वडा अध्यक्ष सुनिल खनाल, नेपाल प्रेस युनियन स्याङ्जाका अध्यक्ष तोलाकान्त बगाले, द ब्रदर्शका अध्यक्ष सागर थापा लगायतले प्रतियोगिताको सफलताको शुभकामना ब्यक्त गर्नुभएको थियो । प्रतियोगितामा प्रथम र द्वितीय हुने समूहले क्रमशः नगद ३१ हजार १११ र द्वितीय पुरस्कार १५१११ सहित शिल्ड, मेडल र प्रमाणपत्र प्राप्त गरेका हुन् । कुल २२ टिमको सहभागिता रहेको उक्त प्रतियोगितामा रोयल क्लबले प्रथम स्थान हासिल गरेको छ भने द्वितीय वीड गाईज भएको छ ।
