वालिङ, ३२ साउन ।
साढे तीनसय वर्ष पुरानो ईतिहास रहेको यहाँको एक मन्दिरको जीर्णोद्धार गरिएको छ । स्याङ्जाको बिरुवा गाउँपालिका ४ मड्किना गुफास्थित शिवजी मन्दिर तथा श्री १००८ चम्पा गिरी जन्म आश्रमको जीर्णाेद्धार गरिएको हो । धार्मिक एवम् ऐतिहासिक दृष्टिले महत्वको स्थलकोरुपमा रहेको मड्किनास्थित आश्रम तथा मन्दिर २०७२ सालको विनाशकारी भूकम्पले क्षति पु¥याएको थियो । धेरै वर्ष पुरानो भएको र ढुङ्गै ढुङ्गाले बनाईएकाले विनाश भएपछि त्यसको संरक्षणकालागि पुरातत्व विभागले जीर्णोद्धार गरिदिएको हो ।
सन्यास सन्यासीहरुको आश्रम स्थलकोरुपमा पहिचान बनाएको यो ठाउँ आयुर्वेदसम्बन्धी औषधोपचार केन्द्रकोरुपमा ख्याति पाएको आश्रमका संरक्षक एवम् पशुपतिनाथका महन्त वेदान्तचार्य स्वामी गोकुलानन्दले बताउनुभयो । लेखपढ गर्ने सिकाई केन्द्रकासाथै धर्म संस्कार संस्कृतिको केन्द्रकोरुपमा आश्रमको छुट्टै पहिचान रहिआएको थियो । तत्कालीन समयमा तीर्थव्रत गर्न जाने श्रद्धालु भक्तजनहरु यही आश्रमको बाटो हुँदै जाने गरेको उहाँले बताउनुभयो ।
गुठी संस्थानमा दर्ता भई सञ्चालनमा रहेको यो नारायणश्वर शिवजी मन्दिर तथा आश्रम पुरानो र जीर्ण हुँदै गएपछि जीर्णोद्धारको काम अगाडि बढेको हो । “धर्म संस्कार संस्कृति तथा ऐतिहासिक दृष्टिले यस ठाउँको छुट्टै पहिचान रहेको छ” उहाँले भन्नुभयो, “ईतिहासको रक्षा र यस ठाउँको पहिचान नामेट हुन नदिन प्रयासरत छौं ।” ऐतिहासिक महत्वको यो ठाउँमा रहेका आश्रम तथा मन्दिर जीर्ण भई लथालिङ्ग हुँदै गएपछि यसको संरक्षणकालागि चासो दिएर पुनर्निर्माण गरिएको आश्रम निर्माण समितिका सचिव कृष्ण गिरीले बताउनुभयो ।
जीर्ण अवस्थामा रहेको आश्रम र शिवजी मन्दिरको पुनर्निर्माण तथा जीर्णोद्धार गरिएको छ । सोही ठाउँमा साधुसन्तको आवास गृह, ब्यवस्थित गौशाला, हवनकुण्ड, यज्ञकुण्ड, शौचालय लगायतका भौतिक संरचनाहरु निर्माण गरिएको उहाँले बताउनुभयो । “समितिसँग निर्माण कार्य गर्न रकम नभएकाले सहयोगी संघ संस्थाहरुबाट आर्थिक सङ्कलन गरी निर्माण कार्य गर्दै आएका छौं” उहाँले भन्नुभयो, “यस ठाउँको प्रचार प्रसारसँगै आर्थिक सङ्कलनकालागि यसअघि महायज्ञसमेत सञ्चालन गरेका थियौं ।”
बिरुवा गाउँपालिकाले यस ठाउँको महत्वकाबारेमा जानकारी गराउन स्थानीय पाठ्यक्रममा चम्पागिरी जन्मआश्रम तथा नारायणश्वर शिवजी मन्दिरको विषयवस्तुलाई समावेश गरेको छ ।
