वालिङ, १० भदौ ।
स्याङ्जाको हरिनास गाउँपालिकाका विभिन्न स्थानमा गरिएको संयुक्त बजार अनुगमनका क्रममा गाउँपालिकाको अनुमतिविना बिक्रीका लागि लैजाँदै गरिएका खाद्य सामग्री र अवैध रूपमा बिक्री भइरहेको इन्धन तथा सूर्तीजन्य पदार्थ नियन्त्रणमा लिइएको छ।
सहायक प्रमुख जिल्ला अधिकारी प्रेम सुवेदीको संयोजकत्वमा रहेको टोली र इलाका प्रहरी कार्यालय चिसापानीबाट प्रहरी सहायक निरीक्षक रामबहादुर थापाको नेतृत्वमा खटिएको प्रहरी टोलीले मङ्गलबार संयुक्त रूपमा उक्त अनुगमन गरेको हो।
अनुगमनका क्रममा हरिनास गाउँपालिका–२, चिसापानी स्थित विभिन्न पसलहरूको निरीक्षण गर्दा ग ५ प ६४५४ नम्बरको मोटरसाइकलमा पालिकाको स्वीकृति नलिई बिक्रीका लागि लैजाँदै गरिएका खाद्य सामग्रीहरू भेटिएका थिए। नियन्त्रणमा लिइएका सामानहरूमा रसबरी ४ बट्टा, मिल्क केक ५ बट्टा, तिल ४ पोका, जिरा २ प्याकेट, पान्डा ३ प्याकेट र स्पाईसी ५ प्याकेट रहेका छन्। अन्दाजी १५ देखि १६ हजार रुपैयाँ बराबरका ती सामानलाई आवश्यक कारबाहीका लागि हरिनास गाउँपालिकामा पठाइएको प्रहरीले जनाएको छ।
यसैगरी अनुगमन टोलीले हरिनास गाउँपालिका वडा नं. ४ स्थित रोदीखोला तथा चित्रेगाउँ क्षेत्रमा गरिएको निरीक्षणका क्रममा अवैध रूपमा बिक्री(वितरण भइरहेको अवस्थामा अन्दाजी ७४ लिटर पेट्रोल, सुर्ती ६ प्याकेट र चुरोट १४ प्याकेट नियन्त्रणमा लिएको छ।
नियन्त्रणमा लिइएका पेट्रोल र सूर्तीजन्य सामग्रीहरूमाथि आवश्यक कानुनी कारबाहीको प्रक्रिया अगाडि बढाइएको अनुगमन टोलीले जनाएको छ। उपभोक्ता हित संरक्षण र बजारलाई मर्यादित बनाउन जिल्लामा अनुगमन कार्यलाई तीव्रता दिइएको छ।
